粵拼

點解簡化字唔適合用嚟寫粵語？

簡化字方案（簡體中文）係一個專為普通話設計嘅漢字書寫方案，用嚟寫粵語會有好多問題。

當前中國大陸地區通行嘅漢字簡化方案，係 1950 年代中國文字改革研究委員會制訂嘅漢字簡化方案，其設計沿襲咗國語統一籌備會嘅簡體字表。而呢一批簡化字之中，有一部分漢字係以同音字合併嘅原則嚟簡化，作為漢字拉丁化最終目標嘅過渡。

呢種簡化方法有兩種問題，第一係同音字合併係以國語/普通話嘅發音為準，並冇考慮到非普通話語言嘅發音。所以如果用簡化字寫粵語，就會有好多粵語中唔同音唔同義嘅字合成一個寫法，增加歧義，徒增溝通同學習成本。最常見嘅例子有「松鼠」讀成「鬆鼠」、「鬍鬚」讀成「鬍須」等，以及「錶面」同「表面」分唔到，「船隻進入運河」變成「船只进入运河」產生歧義。下面嘅表 1 收錄咗所有此類字。

第二個問題係，簡化字方案中仲有一類字係改換聲旁簡化，而聲旁嘅改換往往以普通話發音爲基礎。噉樣就導致咗簡化後嘅漢字聲旁同粵語實際發音衝突，例如「軍艦」簡化成「军舰」後容易被初學者誤讀爲「軍見」。下面嘅表 2 總結咗部分此類字，因爲數量龐雜，僅作不完全收錄，歡迎社羣補充。

表 1： 簡化字方案中因為普通話同音合併但粵語發音唔同嘅字

簡化字及普通話拼音 傳統漢字及粵拼 粵語詞區分示例
卜 bó / bǔ 蔔 baak6 卜 buk1 蘿蔔baak6；占卜buk1
斗 dǒu / dòu 鬥 dau3 斗 dau2 戰鬥dau3；斗dau2笠
复 fù 複 fuk1 復 fuk6 複fuk1印；恢復fuk6
里 lǐ 里 lei5 裏 leoi5 公里lei5；裏leoi5面
表 biǎo 表 biu2 錶 biu1 表biu2演；手錶biu1
干 gān / gàn 干 gon1 乾 gon1/kin4 幹 gon3 比干gon1；主幹gon3；乾gon1燥
仆 pū / pú 仆 puk1 僕 buk6 仆puk1街；僕buk6人
松 sōng 鬆 sung1 松 cung4 鬆sung1散；松cung4鼠
坛 tán 罈 taam4 壇 taan4 酒罈taam4；天壇taan4
系 xì 係繫系 hai6 喺 hai2 即係hai6；聯繫hai6；系hai6統；喺hai2度
吓 xià 嚇 haak3 吓 haa2/haa5 驚嚇haak3；啊吓haa2
须 xū 須 seoi1 鬚 sou1 必須seoi1；鬍鬚sou1
涌 yǒng / chōng 涌 cung1 湧 jung2 河涌cung1；湧jung2現
郁 yù 鬱 wat1 郁 juk1 憂鬱wat1；郁juk1郁juk1青青
脏 zāng / zàng 髒 zong1 臟 zong6 骯髒zong1；內臟zong6
折 zhé 折 zit3 摺 zip3 曲折zit3；摺zip3紙
症 zhēng / zhèng 癥 zing1 症 zing3 癥zing1結；症zing3狀
只 zhī / zhǐ 只 zi2 隻 zek3 只zi2有；一隻zek3

表 2： 簡化字方案中按照普通話發音簡化部件，導致與粵語聲韻衝突嘅字

下表係不完全收錄，歡迎補充。

傳統漢字及粵拼 簡化字及普通話拼音 解釋
壩 baa3 坝 bà 聲旁「霸」簡化爲「贝」，韻母由 aa 變成 ui
補 bou2 补 bǔ 聲旁「甫」簡化爲「卜」 韻母 ou 變成 uk
殲纖 cim1 懺 caam3 纤 xiān 歼 jiān 忏 chàn 聲旁「韱」按普通话发音簡化爲「千」，韻尾由 m 變成 n
擔 daam1 膽 daam2 担 dān 胆 dǎn 聲旁「詹」簡化爲「旦」，韻尾由 m 變成 n
燈 dang1 灯 dēng 聲旁「登」簡化爲「丁」，韻母由 ang 變成 ing
櫃 gwai6 柜 guì 聲旁「貴」簡化爲「巨」，韻母由 wai 變成 eoi
嚇 haak3 吓 xià 聲旁「赫」簡化爲「下」，韻母由 aak 變成 aa
艦 laam6 舰 jiàn 聲旁「監」按普通話發音簡化爲「见」，韻母由 aam 變成 in
鄰 leon4 邻 lín 聲旁「粦」簡化爲「令」，韻母由 eon 變成 ing
撲樸 pok3 扑 pū 朴 pǔ 聲旁「菐」簡化爲「卜」，韻母由 ok 變成 uk
燭觸 zuk1 獨 duk6 烛 zhú 触 chù 独 dú 聲旁「蜀」簡化爲「虫」，韻母由 uk 變成 ung

本站簡體字版

本站雖然有提供簡化字粵文版，但僅作初學者過渡適應用。使用傳統漢字可以更容易習得粵語發音規律，學習者應該以用傳統漢字書寫粵文爲最終目標。